რუსთავის სამოქალაქო კლუბის წევრები სტუმრად რუსთავის მერიაში

27 მარტს სამოქალაქო განათლებისა და პედაგოგთა გადამზადების პროგრამის სამიზნე რუსთავის 9 საჯარო სკოლის  სამოქალაქო კლუბების 13 წევრი რუსთავის მერიას ესტუმრა. შეხვედრა ორგანიზებული იყო სიქას მიერ, რომელიც წარმოადგენს პროგრამის პარტნიორს ქვემო ქართლში. მოსწავლეებს შეხვდა რუსთავის საკრებულოს თავმჯდომარის პირველი მოადგილე კახა ბარათაშვილი.

შეხვედრის მთავარი თემა ქალაქში მიმდინარე ინფრასტრუქტურული სამუშაოები და სამომავლო პროექტების მიმოხილვა იყო.

შეხვედრამდე მოსწავლეებმა თემში ჩაატარეს გამოკითხვა, თუ რამდენად ფლობდა მოსახლეობა ინფორმაციას ქალაქში მიმდინარე მშენებლობების შესახებ და წინდაწინ უნდა იყოს თუ არა ინფორმირებული ქალაქში დაგეგმილი ინფრასტრუქტურული ცვლილებების შესახებ.

მერიაში შეხვედრის დასაწყისში მოსწავლეებმა კახა ბარათაშვილს გააცნეს გამოკითხვის შედეგები, რის შემდეგაც დასვეს კითხვები, რომლებიც შეეხებოდა შეჩერებულ პროექტებს, მიმდინარე წლის ქალაქის ბიუჯეტში გაწერილ პრიორიტეტებს და რუსთავში არსებულ კონკრეტულ პრობლემებს. კახა ბარათაშვილმა ამომწურავი პასუხი გასცა ყველა დასმულ შეკითხვას.

შეხვედრაზე მოსწავლეებმა გამოთქვეს ინიციატივა, თვითმმართველობას დაეხმარონ მოსახლეობის დროულად ინფორმირმირებაში ქალაქში დაგეგმილი მშენებლობების შესახებ, რათა თემმა შეძლოს დაგეგმვის პროცესში თავისი წვლილის შეტანა.

საკრებულოს თავმჯდომარის პირველმა მოადგილემ მადლობა გადაუხადა მოსწავლეებს აქტიურობისათვის. მან მზაობა გამოთქვა, მათთან ერთად განიხილოს ინიციატივები და იმსჯელოს არსებული პრობლემების მოგვარების გზებზე.

"წარმატებული შეხვედრა იყო, რადგან მივიღეთ პასუხები ჩვენს მიერ დასმულ ყველა კითხვაზე. თუმცა ინფორმაცია რაც მივიღე, არცთუ ისე სასიამოვნო იყო, მაგრამ კარგია რომ თანახმანი არიან შეხვედრებზე და თანამშრომლობაზე. მიმაჩნია, რომ აუცილებლად უნდა გაგრძელდეს მსგავსი შეხვედრები და უფრო აქტიურად "- განაცხადა შეხვედრის შემდეგ რუსთავის #20 საჯარო სკოლის სამოქალაქო კლუბის წევრმა ანი სანაიამ.

"სამოქალაქო განათლებისა და პედაგოგთა გადამზადების პროგრამა", რომელსაც ახორციელებს ორგანიზაცია "PH International" და აფინანსებს USAID, ეხმარება მოსწავლეებს ჩამოყალიბდნენ აქტიურ მოქალაქეებად.

რუსთავის სამოქალაქო კლუბების წევრთა შეხვედრა ირინა ფრუიძესთან

27 თებერვალს, რუსთავის დემოკრატიული ჩართულობის ცენტრში  სიქას ორგანიზებით მოეწყო რუსთავის სკოლების სამოქალაქო კლუბის აქტიური წევრების შეხვედრა საქართველოს სკაუტური მოძრაობის გენერალურ მდივანთან ქალბატონ ირინა ფრუიძესთან. 

მოწვეულმა სტუმარმა გაცნობის შემდეგ მოსწავლეებს ესაუბრა და მათთან ერთად განიხილა სხვადასხვა საინეტერესო თემები. ირინა ფრუიძემ ისაუბრა ისეთ საინტერესო საკითხებზე, როგორიცაა: წარმატების საიდუმლო, მოტივაციის მთავარი კომპონენტები, ნეგატიური და პოზიტიური აზროვნება, სწორი თვითშეფასება, რეაქტიული და პროაქტიული  ადამიანების ტიპები, თვითმოტივაცია ცხოვრების მანძილზე განათლების მიღების პროცესში, წიგნის კითხვის მნიშვნელოვნობა, ეფექტური კომუნიკაციის მნიშვნელობა წარმატების გზაზე, განათლების ისეთ გზებზე, როგორიცაა ფორმალური, არაფორმალური და თვითგანათლება.
მოზარდების მხრიდან გამოჩენილი დაინტერესების გამო ისაუბრა „ინტელექტ–კლუბში“ საკუთარ გამოცდილებაზე, ასევე სკაუტური მოძრაობის შესახებ საქართველოში და საქართველოს გარეთ. ახალგაზრდების მხრიდან ჭარბობდა ინტერესი  სკაუტური  ბანაკების და პროგრამების შესახებ.

მოსწავლეებისთვის შეხვედრაზე განხილული თემები  საინტერესო და სასარგებლო აღმოჩნდა.

შეხვედრას რუსთავის 12 საჯარო სკოლის სამოქალაქო კლუბების  40 წევრი დაესწრო.

სამოქალაქო კლუბის წევრები ჯუმბერ ლეჟავას შეხვდნენ

5 მარტს რუსთავის დემოკრატიული ჩართულობის ცენტრში სიქას ორგანიზებით მოეწყო რუსთავის საჯარო სკოლების სამოქალაქო კლუბების წევრებისთვის შეხვედრა ცნობილ სპორტსმენსა და რეკორდსმენთან ჯუმბერ ლეჟავასთან.

სპორტსმენმა თავდაპირველად საკუთარი ცხოვრების შესახებ ისაუბრა, ძირითადი ნაწილის მის მოგზაურობის განხილვას დაეთმო. რეკორდსმენმა ისაუბრა იმ სიძნელეებზე, რომლის გადალახვაც უწევდა მოგზაურობის განმავლობაში, რეკორდის მნიშვნელობასა და მთავარ დანიშნულებაზე.

შეხვედრაზე ძირითადი  ყურადღება გამახვილდა ცხოვრების ჯანსაღი ცხოვრების წესის მნიშვნელობაზე, თუ რატომ და როგორ უნდა იცხოვროს ადამიანმა ჯანსაღი ცხოვრებით. ჯუმბერ ლეჟავამ ახალგაზრდებს მისცა ის კონკრეტული რჩევები, რომლითაც სპორტსმენი ყოველდღიურად ხელმძღვანელობს.

რეკორდსმენმა ასევე ისაუბრა მიზანდასახულობაზე და  ახლაგაზრდებს მოუწოდა, რომ   მიზნის მისაღწევად გამოიყენონ ყველა შესაძლო გზა და დაასრულონ დაწყებული საქმე.

შეხვდრის მეორე ნაწილი მოსწავლეებს შეკითხვებს დაეთმო. კითხვები შეეხებოდა სპორტსმენის სამომავლო გეგმებს.

მოსწავლეებმა გამოთქვეს სურვილი გაწევრიანდნენ ველომრბოლელთა კლუბში და მათთან ერთად სამოქალაქო კლუბებმა დაგეგმონ და განახორციელონ სხვადასხვა აქტივობები.

შეხვედრას რუსთავის 10 საჯარო სკოლის სამოქალაქო კლუბების 23 წევრი დაესწრო.